ஆர்ப்பாட்டங்களின்போது நிதானம் தேவை .. : நவமணி பத்திரிகை ஆசிரியர்.



இலங்கையில் அமுலிலுள்ள முஸ்லிம் விவாக, விவாகரத்து (தனியார்) சட்டத்தில் திருத்தம் மேற்கொள்வது குறித்த விவாதம், அரச, சமூக மட்டங்களில் மிகவும் தீவிரவமாக நடைபெற்று வருகின்ற இவ்வேளையில், கடந்த வியாழனன்று, முஸ்லிம் அமைப்பொன்று நடத்திய ஆர்ப்பாட்டம் காரணமாக, முஸ்லிம் சமூகத்தை கொச்சைப்படுத்தும், முஸ்லிம் சமூகத்துக்கு எதிரான வெறுப்பு பிரசார நடவடிக்கைகள் பேரினவாதத் தரப்பிலிருந்து மேற்கொள்ளப்பட்டு வருகின்றன.


முஸ்லிம் விவாக, விவாகரத்து (தனியார்) சட்டத்தில் திருத்தம் மேற்கொள்ளப்படல் வேண்டும் என்ற கோரிக்கைகள் பல வருடங்களாக முன்வைக்கப்பட்டு, அதற்குரிய பரிந்துரைகளை வழங்குவதற்காக, உயர்நீதிமன்ற முன்னாள் நீதிபதி சலீம் மர்சூபின் தலைமையிலான குழு செயற்பட்டு வருகின்றது.

எவ்வாறாயினும், ஜி.எஸ்.பி. பிளஸ்ஸை பெற்றுக்கொள்வதற்காக, சர்வதேச நியமங்களின்படி, முஸ்லிம் விவாக, விவாகரத்து (தனியார்) சட்டத்தில் மாற்றங்கள் கொண்டு வரப்படவுள்ளதாக, அரசு அறிவித்ததன் பின்னரே, இந்த விவகாரம் பூதாகரம் எடுத்துள்ளது.


முஸ்லிம் தனியார் சட்டத்தில் பல்வேறு திருத்தங்கள் மேற்கொள்ளப்பட வேண்டும் என்ற கோரிக்கை முஸ்லிம் தரப்புக்களினாலேயே முன்வைக்கப்பட்டு வருகின்றது. ஏனெனில், இஸ்லாத்தின் அடிப்படைகளுடனும், இஸ்லாமிய விழுமியங்களுடனும் முரண்படுகின்ற பல்வேறு விடயங்கள், முஸ்லிம் தனியார் சட்டத்தில் உள்ளன.
எனினும், முஸ்லிம் தனியார் சட்டத்தில் திருத்தம் மேற்கொள்வதற்கான முன்னெடுப்பு, வெளிநாட்டு வேண்டுகோள்களுக்கிணங்க மேற்கொள்ளப்படுவதை எதிர்த்தே, முஸ்லிம் தரப்புக்களிடமிருந்து விமர்சனங்கள் எழுந்து வருகின்றன. முஸ்லிம் விவாகர, விவாகரத்து (தனியார்) சட்டத்தில் கை வைக்கப்படுவதை எதிர்த்து, ஸ்ரீலங்கா தௌஹீத் ஜமாஅத், கடந்த வியாழனன்று, கொழும்பு மாளிகாவத்தையிலிருந்து புறக்கோட்டை நோக்கி ஓர் ஆர்ப்பாட்டத்தை நடத்தியிருந்தது.


பேச்சு சுதந்திரமும், ஒன்றுகூடும் சுதந்திரமும் இந்நாட்டு மக்களுக்கு வழங்கப்பட்டுள்ளபோதும், அந்த சுதந்திரங்களை முறையாகப் பயன்படுத்துவதற்கு, ஸ்ரீலங்கா தௌஹீத் ஜமாஅத் தவறிவிட்டது என்றே பலரும் தெரிவிக்கின்றனர். ஏனெனில், ஆர்ப்பாட்டத்தின்போது, ஆர்ப்பாட்ட ஏற்பாட்டாளர்கள் தெரிவித்துள்ள கருத்துக்கள், இந்த நாட்டிலுள்ள பேரினவாதிகளுக்கு அவல் கிடைத்தாற்போல் அமைந்துள்ளன.


முஸ்லிம் சமூகம் தனது விவகாரங்களை கையாள்வதற்கு, இராஜதந்திர வழிமுறைகளை கையாள்வது போன்று, ஆர்ப்பாட்டம், ஒன்றுகூடல்கள் போன்ற வழிமுறைகளையும் பயன்படுத்தலாம். அதில் தவறில்லை. ஆனால், ஆர்ப்பாட்டங்களின்போது எவ்வாறு கருத்து வெளியிடுவது? என்பது குறித்து ஆழ்ந்த நோக்கு அதற்கு வேண்டும். ஆனால், ஸ்ரீலங்கா தௌஹீத் ஜமாஅத் அதில் தவறு விட்டுள்ளது.


பேரினவாதிகள் விமர்சிக்கப்படல் வேண்டும் என்பதில் எந்த சந்தேகமும் இல்லை. இலங்கை பௌத்த பெரும்பான்மை மக்களை கொண்ட நாடாயினும் இனவாதிகள் ஓர் சிறு குழுவினரே என்பதை கருத்திற்கொண்டு, விமர்சிக்கும்போது கையாள வேண்டிய வார்த்தைகளும், பிரயோகங்களும் மிகவும் கவனமாக தேர்ந்தெடுக்கப்படல் வேண்டும். ஓர் சிறு இனவாத குழுவை விமர்சிக்கச் சென்ற நாம் பெரும்பான்மை பௌத்தர்களை பகைத்துக்கொண்ட நிலைமை வந்துவிடக்கூடாது. ஒரு அமைப்பு என்ற வகையில் ஸ்ரீலங்கா தௌஹீத் ஜமாஅத் அதில் பெரும் தவறு விட்டுள்ளது.


சிங்கள பௌத்த சமூகத்தை பொறுத்தவரையில், காவியுடை அணிந்த துறவிகளுக்கு, அவர்கள் பெரும் மதிப்பு வழங்குகின்றனர். துறவிகளின் நடவடிக்கைகள் எவ்வாறு அமைகின்றபோதும், காவியுடைக்கான கௌரவம் அவர்களிடம் குறைவதில்லை. எனவே, இனவாத துறவிகளுக்கு எதிரான சிங்களவர்களும்கூட, ஆர்ப்பாட்டத்தின்போது பயன்படுத்தப்பட்ட வார்த்தைப் பிரயோகங்கள் குறித்து கவலை அடைந்துள்ளனர். ஸ்ரீலங்கா தௌஹீத் ஜமாஅத், தனது பக்கத் தவறுகளுக்காக பகிரங்கமாக மன்னிப்புக் கோர வேண்டும்.

ஸ்ரீலங்கா தௌஹீத் ஜமாஅத்தின் காரசாரமான கருத்துக்கள், இலங்கையின் மொத்த முஸ்லிம்களையும் பிரதிநிதித்துவம் செய்யவில்லை என்பதை ஏனைய முஸ்லிம் அமைப்புக்களும், நிறுவனங்களும் இந்நாட்டு மக்களுக்கு அறிவிக்க வேண்டும்.

அகில இலங்கை ஜம்இய்யத்துல் உலமாக, முஸ்லிம் கவுன்ஸில், தேசிய சூறா சபை என்பன கூட்டாக அறிக்கை விடுத்து, இதனைத் தெளிவுபடுத்த வேண்டும். அப்போதுதான், இனவாதிகள் எப்படியேனும், சிங்கள சமூகத்திலுள்ள நல்லவர்களில் ஏற்பட்டுள்ள காயங்களையேனும் ஓரளவு இல்லாமலாக்கலாம்.
ஆர்ப்பாட்டங்களின்போது நிதானம் தேவை .. : நவமணி பத்திரிகை ஆசிரியர். ஆர்ப்பாட்டங்களின்போது நிதானம் தேவை .. :  நவமணி பத்திரிகை ஆசிரியர். Reviewed by Madawala News on 11/07/2016 01:24:00 PM Rating: 5